மணவாளக்குறிச்சி அருகே சிறுவனை கொன்ற பெண் குண்டர் சட்டத்தில் கைது: மதுரை ஜெயிலில் அடைப்பு

மணவாளக்குறிச்சி அருகே கடியப்பட்டணம் பாத்திமா தெருவை சேர்ந்தவர் ஜாண் ரிச்சர்டு. இவரது மனைவி சகாய சில்ஜா (வயது 28). இவர்களது மகன் ஜோகன் ரிஜி(4...

மணவாளக்குறிச்சி அருகே கடியப்பட்டணம் பாத்திமா தெருவை சேர்ந்தவர் ஜாண் ரிச்சர்டு. இவரது மனைவி சகாய சில்ஜா (வயது 28). இவர்களது மகன் ஜோகன் ரிஜி(4). இவர் கடந்த ஜனவரி மாதம் 21-ம் தேதி திடீரென மாயமானார். இதையடுத்து மணவாளக்குறிச்சி போலீசார் வழக்கு பதிவு செய்து மாயமான ஜோகன் ரிஜியை தேடினர்.

இந்நிலையில் ஜோகன் ரிஜியை பக்கத்து வீட்டை சேர்ந்த பாத்திமா (35) என்பவர் நகைக்கு ஆசைப்பட்டு கொலை செய்து அவரது வீட்டிலுள்ள பீரோவில் பூட்டி வைத்தி ருப்பது தெரியவந்தது. இதையடுத்து போலீசார் அவரது வீட்டில் இருந்த ஜோகன் ரிஜியின் உடலை மீட்டனர். மேலும் பாத்திமா மற்றும் கொலைக்கு உடந்தையாக இருந்த அவரது கணவர் ஷரோபின் ஆகிய இருவரையும் கைது செய்தனர்.

கைது செய்யப்பட்ட ஷரோபினை நாகர்கோவில் ஜெயிலிலும், பாத்திமாவை தக்கலை ஜெயிலிலும் அடைத்தனர். கைது செய்யப்பட்ட பாத்திமாவை குண்டர் சட்டத்தில் கைது செய்ய மாவட்ட போலீஸ் சூப்பிரண்டு ஹரிகிரண் பிரசாத் கலெக்டர் அரவிந்துக்கு பரிந்துரை செய்தார்.

இதை தொடர்ந்து பாத்திமாவை குண்டர் சட்டத்தில் கைது செய்ய கலெக்டர் அரவிந்த் உத்தர விட்டார். இதையடுத்து தக்கலை ஜெயிலில் அடைக்கப் பட்டிருந்த பாத்திமா மதுரை ஜெயிலில் அடைக்கப்பட்டார்.

பாத்திமா குண்டர் சட்டத்தில் கைது செய்யப்பட் டதையடுத்து குமரி மாவட்டத்தில் இந்த ஆண்டு இதுவரை குண்டர் சட்டத்தில் கைது செய்யப்பட்டவர்கள் எண்ணிக்கை 17 ஆக உயர்ந்துள்ளது.