மனதை கொள்ளைகொள்ளும் “லெமூர் கடற்கரை”

இயற்கை எழில் கொஞ்சும் மேற்கு தொடர்ச்சி மலையும், என்றுமே வற்றாத ஜீவ நதிகளையும், அள்ள அள்ள குறையாத மீன் வளத்தையும், நெற்களஞ்சியம் மிகுந்த நா...

இயற்கை எழில் கொஞ்சும் மேற்கு தொடர்ச்சி மலையும், என்றுமே வற்றாத ஜீவ நதிகளையும், அள்ள அள்ள குறையாத மீன் வளத்தையும், நெற்களஞ்சியம் மிகுந்த நாஞ்சில் நாட்டையும், சகோதரத்துடன் வாழும் குறைவில்லா அன்பைக்கொண்ட மக்களையும், முக்கடலும் சங்கமிக்கும் இயற்கை அன்னையின் அருளையும் ஒருசேர பெற்ற இந்தியாவின் தென்கோடியில் அமைந்த சொர்க்க பூமி கன்னியாகுமரி மாவட்டம்.

ஒரு மாவட்டத்தின் அனைத்து பகுதிகளும் சுற்றுலாத் தலங்களாக இருக்கிறது என்றால், அது குமரி மாவட்டம் மட்டுமே.

கன்னியாகுமரியில், விவேகானந்தர் நினைவுப் பாறை, அய்யன் திருவள்ளுவர் சிலை, காந்தியடிகள் நினைவு மண்டபம், காமராஜர் நினைவுக் கூடம், குமரி வரலாற்றுக்கூடம் ஆகியவற்றையும்,

மாவட்டத்தின் பிறபகுதிகளில், மருந்துவாழ்மலை, வட்டக்கோட்டை, உதயகிரி கோட்டை, பத்மநாபபுரம் அரண்மனை, மாத்தூர் தொட்டிப்பாலம், திற்பரப்பு அருவி உள்பட பல சிறப்பு மிக்க தலங்களை கொண்டுள்ளது.

சொத்தவிளை பீச்

திரிவேணி சங்கமம் கடற்கரை, சங்குத்துறை கடற்கரை, சொத்தவிளை, தெக்குறிச்சி, முட்டம் கடற்கரை, குளச்சல் கடற்கரை, தேங்காய்பட்டணம் கடற்கரை ஆகியவை மக்களின் மனம் கவர்ந்த கடற்கரைகளாகும்.

குமரி மாவட்டத்தில் இன்னொரு சிறப்புமிக்க அழகிய கடற்கரையாக நிகழ்வது “லெமூர் கடற்கரை”. உண்மையில் இந்த கடற்கரைக்கு வரும் மக்கள் மனநிம்மதி பெற்று செல்கிறார்கள் என்றால் அது மிகையாகாது. அந்த அளவுக்கு மனஅமைதி தரும் கடற்கரை.

கன்னியாகுமரியில் இருந்து 32 கிமீ தொலைவிலும், நாகர்கோவிலில் இருந்து 14 கிமீ தொலைவிலும் அமைந்துள்ளது “லெமூர் கடற்கரை”. நாகர்கோவிலில் இருந்து குளச்சல் செல்லும் சாலையில் இராஜக்கமங்கலம் பகுதியை அடுத்த கணபதிபுரம் பேரூராட்சிக்கு உட்பட்ட இயற்கை எழில் கொஞ்சும் பகுதியில் அமைந்துள்ளது.

கணபதிபுரம் ஜங்ஷனில் இருந்து தெற்கே செல்லும் சாலையில் ஏறத்தாழ ஒரு கிமீ தொலையில் சென்றால், லெமூர் கடற்கரையை அடையலாம். செல்லும் வழி இருபுறமும் தென்னைமரங்கள் உங்களை வரவேற்று செல்லும் காட்சியை அழகாக ரசிக்கலாம்.

கடற்கரையை வாகனம் அடையும்போது, அங்கே அமைக்கப்பட்டுள்ள அலங்கார நுழைவுவாயினை காணும் நேரம், நீங்கள் ஒரு பிரமிப்பை அடைவீர்கள். ஏனெனில், அந்த அளவுக்கு மத்திய அரசு அழகிய வேலைபாடுகளுடன் கடற்கரையை அழகுபடுத்தி உள்ளது.

நுழைவாயில் உள்ளசென்றால் வலது பக்கம் உள்ள கோவிலில் தரிசனம் பண்ணலாம். அலங்கார வண்ண கற்களும், மார்பிள் இருக்கைகளும் உங்களை மெய்சிலிர்க்க வைக்கும்.

குமரி மாவட்டத்தின் நீண்ட, அகலமான கடற்கரையாக “லெமூர் கடற்கரை” உள்ளது. கடற்கரையில் அமர்ந்து கடல் அலையை ரசிக்கும் போது, உங்கள உள்ளத்திற்குள் ஒரு பரவசநிலை ஏற்படுவதை உணரலாம்.

மனஅமைதி, புதிய இடங்களை தேடி செல்பவர்கள் மட்டுமல்லாது, அனைத்து மக்களும் சென்றுவர, மனதை கொள்ளைகொள்ளும் அழகிய, சுத்தமான கடற்கரை “லெமூர் கடற்கரை”. இந்த கடற்கரைக்கு “ஆயிரம்கால் பொழிமுகம்” என்ற மற்றொரு பெயரும் உண்டு.

தகவல்

ஜோதி பாஸு

இராஜக்கமங்கலம்